Son dövrlərdə xarici ölkə vətəndaşları ilə azərbaycanlılar arasında bağlanan nikahların sayında artım müşahidə olunur.

Realmedia.info xəbər verir ki, Dövlət Statistika Komitəsi-nin məlumatına əsasən, 2025-ci ildə Ədliyyə Nazirliyi-nin rayon və şəhər qeydiyyat şöbələri tərəfindən ölkədə ümumilikdə 48 546 nikah qeydə alınıb. Bu nikahlardan 937-si Azərbaycan vətəndaşı olan qadınlarla xarici ölkə vətəndaşı kişilər arasında, 1 127-si isə Azərbaycan vətəndaşı kişilərlə xarici ölkə vətəndaşı qadınlar arasında bağlanıb.

Mövzu ilə bağlı açıqlama verən psixoloq Aygül Məlikova bildirib ki, gənclərin bu istiqamətə meyil etməsinin əsas səbəblərindən biri ailədaxili münasibətlərdir. Onun sözlərinə görə, bəzi gənclər ailədə özlərini dəyərsiz hiss edir və sevgi, diqqət ehtiyacını daha dərindən yaşamaq istəyirlər.

“Burada sosial medianın da təsiri böyükdür. Xarici vətəndaşla ailə quraraq xoşbəxt həyatını paylaşan insanları görən gənclərdə ‘mən də belə bir həyat yaşaya bilərəm’ düşüncəsi formalaşır”, – deyə o qeyd edib.

Mütəxəssislər hesab edir ki, qloballaşma fonunda bu tendensiya qaçılmazdır. Lakin əsas məsələ milli-mənəvi dəyərlərin qorunması, mədəni kimliyin itirilməməsi və sevgi, hörmət, insan hüquqlarına əsaslanan sağlam ailə modelinin qurulmasıdır.