Azərbaycan Respublikası Elm və Təhsil Nazirliyi tərəfindən elan olunan Təhsildə inkişaf və innovasiyalar üzrə IX qrant müsabiqəsində Cəbrayıl rayonu Tatar kənd tam orta ümumtəhsil məktəbinin riyaziyyat müəllimləri Əfsanə İbrahimova və Murad Rəsulzadənin təqdim etdiyi layihələr qalib elan edilib. Hazırda həmin layihələrin icra mərhələsi davam edir. Murad Rəsulzadənin təqdim etdiyi "Riyaziyyatda fərq yarat" layihəsi çərçivəsində şagirdlər "Khan Academy" platformasının imkanlarından istifadə edərək öz riyazi bilik və bacarıqlarını təkmilləşdirir, eyni zamanda rəqəmsal bacarıqlarını inkişaf etdirirlər.
Əfsanə İbrahimova tərəfindən təqdim olunan "KenMath-Kenquru Beynəlxalq Riyaziyyat Olimpiadasına hazırlıq" layihəsinin isə əsas məqsədi 5–8-ci sinif şagirdlərinin riyazi-məntiqi bacarıqlarının inkişaf etdirilməsi, həmçinin onların Kenquru Beynəlxalq Riyaziyyat Olimpiadasına sistemli və məqsədyönlü şəkildə hazırlaşdırılmasıdır.
Hər iki layihənin əsas hədəfi şagirdlərdə riyazi bacarıqların inkişafı, məntiqi düşünmə, analitik təhlil, qeyri-standart məsələlərin həlli və sürətli qərarvermə bacarıqlarının formalaşdırılmasıdır.



Şamil Sabiroğlu, jurnalist.
15.09.2026.