Ölkənin ali təhsil müəssisələrində rəqəmsal bacarıqlar üzrə beynəlxalq səviyyəli intensiv təhsil proqramı “IT SkillSprint” rəsmi şəkildə fəaliyyətə başlayıb. Proqramın açılış mərasimi bu gün keçirilib.

Layihə Rəqəmsal İnkişaf və Nəqliyyat Nazirliyi, Elm və Təhsil Nazirliyi, İnnovasiya və Rəqəmsal İnkişaf Agentliyi, Elm və Ali Təhsil üzrə Dövlət Agentliyi və “Ironhack” tədris şirkətinin əməkdaşlığı ilə həyata keçirilir.

Tədbirdə çıxış edən qurum nümayəndələri proqramın əsas məqsədinin tələbələrin müasir texnologiyalar və rəqəmsal bacarıqlar sahəsində biliklərini artırmaq, onları qlobal əmək bazarına hazırlamaq və universitetlə sənaye arasında əməkdaşlığı gücləndirmək olduğunu bildiriblər.

Proqrama qəbul olunan tələbələr intensiv təhsil kurslarında iştirak edəcək, real layihələr üzərində işləyərək praktiki təcrübə qazanacaqlar. Bu isə onların həm yerli, həm də beynəlxalq səviyyədə rəqabətqabiliyyətli mütəxəssislər kimi formalaşmasına töhfə verəcək.