Fövqəladə Hallar Nazirliyi (FHN) gözlənilən qeyri-sabit hava şəraiti ilə əlaqədar əhaliyə xəbərdarlıq edib.

Realmedia.info xəbər verir ki, Fövqəladə Hallar Nazirliyi Milli Hidrometeorologiya Xidmətinin məlumatına əsasən yaxın günlərdə ölkə ərazisində hava şəraitinin dəyişkən keçəcəyi, bəzi yerlərdə intensiv yağışların yağacağı, dağ çaylarından qısamüddətli sel keçəcəyi, şimşək çaxacağı və arabir güclü külək əsəcəyi proqnozlaşdırıldığını bildirib.

Nazirlik vətəndaşlara təhlükəsizlik qaydalarına ciddi əməl etməyi tövsiyə edib. Bildirilib ki, güclü külək zamanı yüngül konstruksiyalı və müvəqqəti tikililərdən uzaq durmaq, eləcə də bina və reklam lövhələrinin yaxınlığında olmamaq vacibdir. Həmçinin elektrik dirəkləri və hündür ağacların altında dayanmaq təhlükəli hesab olunur.

Qeyd olunub ki, mümkün fəsadların qarşısının alınması üçün vətəndaşlar ehtiyatlı olmalı və rəsmi xəbərdarlıqları izləməlidirlər.