Türk Dövlətləri Təşkilatı (TDT) ölkələrinin liderləri 17-22 may 2026-cı il tarixlərində Bakıda keçiriləcək Ümumdünya Şəhərsalma Forumunun 13-cü sessiyasında (WUF13) fəal iştirak edəcəklərini bəyan ediblər.

Realmedia.info xəbər verir ki, bu barədə TDT-nin qeyri-rəsmi sammitinin yekunları üzrə qəbul olunmuş Türküstan Bəyannaməsində qeyd edilib.

Bəyannamədə şəhərsalma planlaşdırılmasının, rəqəmsal texnologiyaların və innovativ yanaşmaların dayanıqlı şəhərlərin formalaşdırılmasında strateji əhəmiyyət daşıdığı vurğulanıb.

Sənəddə bildirilib ki, tərəflər “Dünyanın mənzillə təminatı: təhlükəsiz və dayanıqlı şəhərlər və icmalar” mövzusunda keçiriləcək WUF13 forumunda fəal iştirak etmək niyyətlərini təsdiqləyirlər.

Eyni zamanda, TDT ölkələri süni intellekt və rəqəmsal texnologiyalar sahəsində əməkdaşlığın genişləndirilməsi, həmçinin TÜRKPA vasitəsilə hüquqi bazaların uyğunlaşdırılması istiqamətində səylərin artırılması barədə razılığa gəliblər.

Liderlər 2025-ci ilin noyabr ayında Azərbaycanda yaradılmış Beynəlxalq Telekommunikasiya İttifaqının Regional Akselerasiya Mərkəzinin fəaliyyətini də yüksək qiymətləndiriblər. Bildirilib ki, mərkəz rəqəmsal innovasiyaların inkişafı, startap ekosisteminin dəstəklənməsi və regionda rəqəmsal transformasiyanın sürətləndirilməsi baxımından mühüm rol oynayır.

Bəyannamədə qeyd olunub ki, mərkəzin əsas məqsədi innovasiya və sahibkarlıq potensialının gücləndirilməsi, əməkdaşlıq imkanlarının genişləndirilməsi və rəqəmsal inkişaf prosesinin sürətləndirilməsidir.