Azərbaycan Prezidenti İlham Əliyev bildirib ki, İkinci Qarabağ müharibəsi zamanı Azərbaycana qarşı ciddi beynəlxalq təzyiqlər göstərilsə də, bu cəhdlərin heç biri nəticə verməyib.

Dövlət başçısı Zəngilan şəhərində sakinlərlə görüşü zamanı çıxışında qeyd edib ki, 44 günlük Vətən müharibəsi dövründə Azərbaycanı dayandırmaq istəyən ölkələrin sayı kifayət qədər çox idi.

Prezident vurğulayıb ki, həmin dövrdə ATƏT-in Minsk qrupunun həmsədri olan dövlətlər müxtəlif səbəblərlə Azərbaycanın irəliləyişini dayandırmağa çalışırdılar:
“44 gün ərzində dəfələrlə bizə təzyiqlər göstərilirdi. O ölkələr sıradan olan ölkələr deyil - onlar nüvə dövlətləridir, onlar BMT Təhlükəsizlik Şurasının daimi üzvləridir”, - deyə İlham Əliyev bildirib.

Dövlət başçısının sözlərinə görə, həmin qüvvələr işğal vəziyyətinin davam etməsini istəyir, bu məsələni Azərbaycana qarşı təzyiq aləti kimi istifadə etməyə çalışırdılar. Prezident əlavə edib ki, təkcə həmsədr ölkələr deyil, digər bəzi dövlətlər də Azərbaycanın qələbəsini istəmirdi.

İlham Əliyev qeyd edib ki, bütün təzyiqlərə baxmayaraq Azərbaycanın geri addım atmaması böyük siyasi iradə tələb edirdi. O bildirib ki, bu məsələdə xalqın birliyi və dəstəyi əsas rol oynayıb:

“Bütün xalqımız bir yumruq kimi birləşmişdi. O mənə güc verirdi. İşin sonuna qədər - Şuşanın azad olunmasına qədər biz dayanmaq fikrində deyildik”, - deyə Prezident vurğulayıb.
Dövlət başçısı çıxışında xalq-iqtidar birliyinin Azərbaycanın tarixi zəfərinin əsas amillərindən biri olduğunu diqqətə çatdırıb.