Hazırda fəaliyyətdə olan Mərkəzi Seçki Komissiyası (MSK) və aşağı seçki komissiyalarının üzvlərinin 5 illik səlahiyyət müddəti apreldə başa çatır. Qanunvericiliyə əsasən, MSK, Dairə Seçki Komissiyaları və Məntəqə Seçki Komissiyaları yeni tərkibdə formalaşdırılacaq.

Realmedia.info-nun məlumatına görə, aprelin 17-də Milli Məclisin iclasında MSK-nın yeni tərkibi seçiləcək. Yeni Milli Məclisdə 11 partiya təmsil olunur, YAP 67 mandatla ən çox, partiyasız deputatlar isə 45 mandatla təmsil olunur.
Qanuna görə, MSK üzvləri belə bölünür: 6 üzv çoxluqda olan partiyanın, 6 üzv azlıq partiyaların, 6 üzv isə partiyasız deputatların təqdim etdiyi nümayəndələrdən seçilir.

Hazırkı MSK tərkibində YAP, azlıq partiyaları və partiyasız deputatların nümayəndələri təmsil olunur. Məzahir Pənahov MSK-ya 2000-ci ildən sədrlik edir. Yeni tərkibdə köhnə üzvlərin təxminən 50 faizi yer almayacaq, yeni təmsilçilik hüququ qazanan AMİP və BAP da komissiyalarda təmsil olunacaq.