Bakı–Tbilisi–Qars dəmir yolu layihəsinin rəsmi açılış mərasimi iyunun 2-də Gürcüstanın Axalkalaki stansiyasında baş tutacaq.

Mərasimdə Azərbaycan, Gürcüstan və Türkiyədən rəsmi nümayəndələrin iştirakı nəzərdə tutulur.

Qeyd edək ki, BTQ dəmir yolu 2017-ci ildən test rejimində fəaliyyət göstərsə də, layihə yalnız indi rəsmi şəkildə istismara veriləcək. Ümumi uzunluğu 827 kilometr olan magistralın 213 kilometri Gürcüstan ərazisindən keçir.

Layihənin Gürcüstan hissəsinin tikintisi Azərbaycan tərəfindən ayrılmış 775 milyon ABŞ dolları kredit hesabına maliyyələşdirilib və bu kreditin layihədən əldə olunacaq gəlirlər hesabına geri qaytarılması planlaşdırılır.

Azərbaycan Dəmir Yolları tərəfindən 2023-cü ilin mayından 2024-cü ilin mayınadək aparılan modernizasiya işləri nəticəsində xəttin illik yükdaşıma qabiliyyəti 1 milyon tondan 5 milyon tona çatdırılıb.

Layihənin tam istifadəyə verilməsi regionda yükdaşımaların səmərəliliyinin artırılması baxımından mühüm addım kimi qiymətləndirilir.