Bakının Sabunçu rayonunda ölümlə nəticələnən ağır yol-nəqliyyat hadisəsi baş verib.

realmedia.info xəbər verir ki, hadisə Ramana qəsəbəsi, Yeni Ramana yolunda qeydə alınıb. 214 nömrəli müntəzəm marşrut xətti üzrə hərəkət edən “Daewoo” markalı, 10-TG-815 dövlət qeydiyyat nişanlı avtobus piyadanı vurub.

Hadisə nəticəsində 1951-ci il təvəllüdlü Bağda Sovin qızı aldığı ağır xəsarətlərdən hadisə yerində dünyasını dəyişib.

Azərbaycan Yerüstü Nəqliyyat Agentliyindən (AYNA) bildirilib ki, avtobus piyada səkisinə çıxaraq 214A nömrəli avtobusdan düşən sərnişini vurub. Hadisə ilə bağlı araşdırma aparılır.

Faktla bağlı Rayon Polis İdarəsində Cinayət Məcəlləsinin müvafiq maddəsi ilə cinayət işi başlanılıb. İstintaq tədbirləri davam etdirilir.

AYNA həmçinin qeyd edib ki, 214 və 214A nömrəli marşrutlarda əvvəllər də sərnişindaşıma qaydalarının pozulması halları qeydə alındığı üçün xətt üzrə yeni daşıyıcı müəyyən edilib.