İranda son etiraz aksiyalarından sonra Tehranda və digər iri şəhərlərdə elektrik enerjisinin verilməsində məhdudiyyətlər tətbiq edildiyi iddia olunur.

Realmedia xəbər verir ki, dünən Tehranda keçirilən etiraz aksiyalarına dair yeni videogörüntülər sosial şəbəkələrdə yayılıb. Kadrlarda etirazçıların tam qaranlıq şəraitdə mobil telefonlarının işığını yandıraraq aksiya keçirdiyi görünür.

Bəzi görüntülərdə isə qısa müddət ərzində səmada atəşfəşanlığa bənzər işıq partlayışlarının müşahidə edildiyi qeyd olunur. Sosial media istifadəçiləri bunu təhlükəsizlik qüvvələrinin diqqəti yayındırmaq və ya etirazların miqyasını gizlətmək cəhdi kimi dəyərləndirirlər.

Rəsmi Tehran isə şəhərlərdə işıqların söndürülməsi ilə bağlı yayılan məlumatlara hələlik münasibət bildirməyib. Ekspertlərin fikrincə, hakimiyyətin bu addımı etirazların koordinasiyasını çətinləşdirmək və aksiyaların yayılmasının qarşısını almağa yönəlib.

Qeyd edək ki, son günlər İranda sosial-iqtisadi vəziyyət və siyasi məhdudiyyətlər fonunda narazılıqlar yenidən artmaqdadır.