İranda son bir həftə ərzində baş verən iğtişaşlar zamanı azı 16 nəfər həyatını itirib, 582 nəfər isə həbs edilib.
Realmedia.az xəbər verir ki, bu barədə İranda fəaliyyət göstərən “HRANA” İnsan Haqları Təşkilatı məlumat yayıb. Təşkilatın açıqlamasında bildirilir ki, ölənlər və saxlanılanlar ölkənin müxtəlif şəhərlərində keçirilən etiraz aksiyaları zamanı qeydə alınıb.
Məlumata görə, etirazlar əsasən sosial-iqtisadi problemlər, yüksək inflyasiya və milli valyutanın dəyərdən düşməsi fonunda başlayıb və qısa müddətdə bir sıra bölgələrə yayılıb.
HRANA-nın açıqladığı statistikada qeyd olunur ki, təhlükəsizlik qüvvələrinin müdaxiləsi nəticəsində ölən və saxlanılanların sayı arta bilər. Hadisələrlə bağlı İran rəsmiləri isə hələlik ətraflı açıqlama verməyib.
Hazırda ölkədə vəziyyət gərgin olaraq qalır, təhlükəsizlik tədbirləri gücləndirilib və istintaq tədbirləri davam etdirilir.