Azərbaycan Prezidentinin köməkçisi, Heydər Əliyev Fondunun icraçı direktoru Anar Ələkbərov Oğuz rayonunun Xaçmaz kəndində Vətən Müharibəsi Qəhrəmanı, şəhid Nail İbrahimlinin ailəsinin qonağı olub.

Qanuntv.az xəbər verir ki, bu barədə Anar Ələkbərov özünün “Instagram” səhifəsində paylaşım edib.

“​Səmimi qarşılanma və qonaqpərvərliyə görə təşəkkür edirik. Allah bütün şəhidlərimizə rəhmət eləsin!”, – deyə paylaşımda qeyd olunub.

Qeyd edək ki, Vətən Müharibəsi Qəhrəmanı Nail İbrahimli 44 günlük Vətən müharibəsində pulemyotçu kimi iştirak edib. O, Füzuli, Cəbrayıl, Qubadlı, Zəngilan və Şuşanın azadlığı uğrunda gedən döyüşlərdə qəhrəmanlıq göstərib.

Nail İbrahimli Xudafərin körpüsü istiqamətində və digər əməliyyatlarda tətbiq etdiyi uğurlu taktiki addımlarla döyüşlərin gedişinə mühüm töhfə verib. O, 2020-ci il noyabrın 8-də Şuşa döyüşlərində şəhid olub və noyabrın 12-də Oğuz rayonunun Xaçmaz kəndində yerləşən Şəhidlər xiyabanında dəfn edilib.

Şəhid Nail İbrahimli ölümündən sonra “Vətən Müharibəsi Qəhrəmanı”, “Vətən uğrunda”, “Şuşanın azad olunmasına görə”, “Xocavəndin azad olunmasına görə” və “Füzulinin azad olunmasına görə” medalları ilə təltif olunub.



Fotoda: Şəhid Nail İbrahimli