Azərbaycanda orqan donorluğu mövzusu yenidən ictimai müzakirələrin mərkəzinə çevrilib. Buna səbəb bir neçə gün əvvəl avtomobil qəzasında həyatını itirən gənc qadının orqanlarının bağışlanması nəticəsində altı nəfərin həyatının xilas edilməsi olub.

Realmedia.info xəbər verir ki, Baku TV-nin hazırladığı süjetdə vətəndaşların bu məsələyə münasibəti və mütəxəssislərin fikirləri yer alıb.

Sorğuda iştirak edən vətəndaşların bir qismi orqan donorluğunu müsbət qiymətləndirərək bunun digər insanlara yeni həyat şansı verdiyini bildiriblər.

Onların fikrincə, insan dünyasını dəyişdikdən sonra orqanlarının torpaqda çürüməsi əvəzinə ehtiyacı olan şəxslərə bağışlanması daha faydalıdır.

Vətəndaşlardan biri bildirib ki, oğlu vəfat edəcəyi halda orqanlarının bağışlanmasını istəyir:

"Oğlum deyir ki, mən öləndə orqanlarımı bağışlayarsan. Qoy torpaqda çürüməsin, kimsə ondan istifadə etsin. Məni görmək istəyəndə gedib həmin insanları görərsən".

Transplantoloqlar qeyd edirlər ki, 18-65 yaş aralığında olan sağlam şəxslər orqan donoru ola bilərlər.

Tibb elmləri doktoru Rəşad Şolanın sözlərinə görə, canlı donordan əsasən böyrək və qaraciyərin bir hissəsi götürülür:

"Beyin ölümü baş vermiş şəxslərdən isə uyğun olduğu halda bir neçə orqanın transplantasiyası mümkündür".

Mütəxəssislər vurğulayırlar ki, orqan transplantasiyası ağır xəstəliklərdən əziyyət çəkən minlərlə insan üçün yeganə müalicə yoludur. Lakin donor sayının az olması səbəbindən bir çox xəstələr uzun müddət növbə gözləməli olurlar.

Qeyd edək ki, hazırda Azərbaycanda orqan donoru olmaq istəyən şəxslər Orqan Donorluğu və Transplantasiyası üzrə Koordinasiya Mərkəzinə müraciət etməklə və ya onlayn qeydiyyatdan keçməklə donor kimi qeydiyyata düşə bilərlər.