1988-ci il fevralın 7-də Biləsuvar rayonunun Əliabad kəndində anadan olan Mübariz İbrahimov orta təhsilini başa vurduqdan sonra hərbi xidmətə yollanıb. O, həqiqi hərbi xidmətini Daxili Qoşunların Xüsusi Təyinatlı Bölüyündə keçib və çavuş rütbəsində başa vurub. Daha sonra yenidən hərbi xidmətə qayıdaraq gizir kimi Azərbaycan Ordusunda xidmətini davam etdirib.

2010-cu il iyunun 18-dən 19-na keçən gecə Tərtərin Çaylı istiqamətində düşmən mövqelərinə qarşı həyata keçirdiyi qəhrəmanlıq əməliyyatı ilə Azərbaycan xalqının yaddaşında əbədi iz qoyub. Mübariz İbrahimov qeyri-bərabər döyüşdə düşmənə ağır itkilər verdirərək son nəfəsinə qədər vuruşub və qəhrəmancasına şəhid olub.

Ermənistan tərəfi şəhid hərbçimizin nəşini 141 gün saxladıqdan sonra 2010-cu il noyabrın 6-da Azərbaycana təhvil verib. Noyabrın 7-də keçirilən vida mərasimindən sonra Milli Qəhrəman II Fəxri xiyabanda torpağa tapşırılıb.

Azərbaycan Prezidenti İlham Əliyevin sərəncamı ilə Mübariz İbrahimov göstərdiyi misilsiz igidliyə və Vətən uğrunda fədakarlığına görə ölümündən sonra "Azərbaycanın Milli Qəhrəmanı" adına layiq görülüb.

Bu gün Azərbaycan xalqı qəhrəman oğlunun xatirəsini dərin ehtiramla yad edir. Mübariz İbrahimovun adı Vətən sevgisinin, cəsarətin və qəhrəmanlığın rəmzi kimi yaşayır.