Realmedia.info xəbər verir ki, bu il Azərbaycanda Məhərrəm ayı iyunun 16-da başlayacaq, Aşura günü isə iyunun 25-nə təsadüf edəcək.

Məlumata görə, bunu ilahiyyatçı alim, Qafqaz Müsəlmanları İdarəsinin (QMİ) məsul əməkdaşı Samid Quliyev açıqlamasında bildirib.

Onun sözlərinə görə, iyunun 16-sı hicri-qəməri təqvimi ilə 1448-ci ilin ilk günü hesab olunur.

Qeyd olunub ki, Məhərrəm ayı İslam təqviminin ilk ayı olmaqla yanaşı, müsəlmanlar üçün mənəvi dəyərlərin, səbir, fədakarlıq və iman nümunələrinin xatırlandığı mühüm dövrlərdən biridir.

Samid Quliyev bildirib ki, Məhərrəm ayının ən mühüm günlərindən biri Aşura günüdür. Bu il Aşura günü iyunun 25-nə təsadüf edir.

İlahiyyatçı vurğulayıb ki, Aşura günü İslam tarixinin ən kədərli və eyni zamanda ən şərəfli hadisələrindən biri hesab olunan Kərbəla faciəsi ilə bağlıdır. Hicrətin 61-ci ilində baş verən hadisə zamanı Həzrət Məhəmməd Peyğəmbərin (s) nəvəsi İmam Hüseyn və onun silahdaşları haqq, ədalət və mənəvi dəyərlər uğrunda şəhid olublar.

Qeyd edilib ki, Kərbəla hadisəsi əsrlər boyu müsəlmanların yaddaşında zülmə qarşı mübarizənin, haqq yolunda dönməzliyin və mənəvi qəhrəmanlığın simvolu kimi yaşamaqdadır.

Məlumata əsasən, Azərbaycanda Məhərrəm ayı ərzində məscidlərdə və dini məkanlarda müxtəlif mərasimlər, dini-maarifləndirici tədbirlər keçirilir. Aşura günü isə qanvermə aksiyaları, xeyriyyə tədbirləri və ehtiyacı olan insanlara yardım kampaniyaları təşkil olunur.