Birinci Birinci Qarabağ müharibəsi zamanı şəhidlik zirvəsinə ucalan və 32 il itkin düşmüş hesab olunan Rəşadət Əli oğlu Piriyevin nəşinin qalıqları aşkar edilib.

Realmedia.info xəbər verir ki, Azərbaycanın aidiyyəti dövlət qurumları tərəfindən həyata keçirilən genişmiqyaslı araşdırma, ekshumasiya və DNT identifikasiyası tədbirləri nəticəsində şəhidin şəxsiyyəti tam müəyyənləşdirilib.

İllər sonra tapılan şəhidimizin nəşinin qalıqları yaxın günlərdə ailəsinə təhvil veriləcək. Rəşadət Piriyev doğma yurdu olan Yeni Daşkənd kəndində mayın 22-də torpağa tapşırılacaq.



Qeyd edək ki, Rəşadət Əli oğlu Piriyev 1 oktyabr 1973-cü ildə Bərdə rayonunun Yeni Daşkənd kəndində anadan olub. O, müharibə illərində Kəlbəcər, Laçın, Ağdam və Ağdərə istiqamətlərində gedən ağır döyüşlərdə həm rabitəçi operator, həm də hərbi texnikanın zərərsizləşdirilməsi üzrə əməliyyatçı kimi iştirak edib.

O, 11 fevral 1994-cü ildə Kəlbəcərin Yanşaq kəndi uğrunda gedən döyüşlər zamanı şəhid olub.

Şəhidimizin nəşinin illər sonra tapılması ailəsi və yaxınları üçün böyük təsəlli olmaqla yanaşı, xalqımızın yaddaşında qəhrəmanlıq salnaməsinin bir daha yaşadıldığını göstərir.