Sabiq əmək və əhalinin sosial müdafiəsi naziri Füzuli Ələkbərova məxsus “Improtex Group”a daxil olan şirkətlərdən biri – “İmprotex İndustries” MMC-nin dövlət büdcəsinə külli miqdarda vergi borcu yaranıb.
Realmedia İqtisadiyyat.az-a istinadən xəbər verir ki, yaydığı məlumata görə, bu barədə kommersiya qurumlarının dövlət reyestrində məlumat yer alıb.

Bildirilib ki, “İmprotex İndustries” MMC-nin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə 2 milyon 223 min 740 manat 24 qəpik məbləğində vergi borcu var.
Qeyd edək ki, şirkət 2010-cu ildə dövlət qeydiyyatına alınıb. MMC-nin qanuni təmsilçisi Ələkbərov Ruslan Nizami oğludur. O, sabiq nazir Füzuli Ələkbərovun qardaşı oğludur.

Məlumata görə, 2013-cü ildən etibarən şirkətin metal konstruksiyalar, yük maşınları üçün üst qurğular və kənd təsərrüfatı qoşquları istehsal edən zavodu fəaliyyət göstərir. “Improtex” qrupu isə 1991-ci ildə yaradılıb. Füzuli Ələkbərovun nazir olduğu dövrdə holdinqə onun həyat yoldaşı İradə Ələkbərova rəhbərlik edib.

Hazırda “Improtex Group”a “İmprotex Trucks & Buses”, “İmprotex Industries”, “İmprotex Motors” və “Imagro” kimi törəmə şirkətlər daxildir. Qrup “Rolls Royce”, “BMW”, “MAN Truck & Bus SE”, “Bobcat”, “Massey Ferguson”, “Hardox” və digər tanınmış dünya brendləri ilə əməkdaşlıq edir.