Azərbaycan Respublikasının Prezidenti İlham Əliyev iyunun 17-də ABŞ Konqresinin Nümayəndələr Palatasının üzvü Abraham Hamadeni qəbul edib.

Görüş zamanı dövlət başçısı Donald Trampın ikinci dəfə hakimiyyətə gəlişindən sonra Azərbaycan-ABŞ münasibətlərinin uğurla inkişaf etdiyini vurğulayıb. Prezident İlham Əliyev ABŞ lideri ilə şəxsi münasibətlərinin yüksək səviyyədə olduğunu qeyd edərək, Birləşmiş Ştatlara səfərlərini və Donald Trampla görüşlərini məmnunluqla xatırladıb.

Söhbət zamanı "Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası"nın əhəmiyyətinə diqqət çəkilib, bu sənədin ikitərəfli əlaqələrin inkişafında mühüm rol oynadığı bildirilib.

Görüşdə ABŞ Konqresində Azadlığa Dəstək Aktına 907-ci düzəlişin ləğvi ilə bağlı irəli sürülmüş qanun layihəsinə Abraham Hamadenin həmmüəllif olması da yüksək qiymətləndirilib.

Abraham Hamade Azərbaycanda olmaqdan məmnunluğunu ifadə edərək, ölkəmizin strateji coğrafi mövqeyə malik olduğunu bildirib. O, Bakının UFC və "Formula-1" kimi beynəlxalq idman yarışlarına uğurla ev sahibliyi etdiyini də vurğulayıb.

Tərəflər Azərbaycan-ABŞ münasibətlərinin perspektivləri, iqtisadi-ticari əlaqələr, sərmayələr, enerji, təhlükəsizlik, nəqliyyat bağlantıları və texnologiya sahələrində əməkdaşlığın genişləndirilməsi imkanları ətrafında fikir mübadiləsi aparıblar.

Realmedia.info