Prezident İlham Əliyev Azərbaycan Ağsaqqallar Şurasının IX Qurultayı münasibətilə iştirakçılara müraciət ünvanlayıb.

Realmedia.info xəbər verir ki, dövlət başçısı müraciətində ağsaqqallıq ənənəsinin Azərbaycan xalqının tarixi-mədəni irsində xüsusi yer tutduğunu bildirib. O qeyd edib ki, “Kitabi-Dədə Qorqud” kimi qədim mənbələrdə ağsaqqallara hörmət ən ali dəyərlərdən biri kimi təqdim olunur.

Prezident vurğulayıb ki, ağsaqqallar cəmiyyətdə həm mənəvi dəyərlərin qorunması, həm də gənc nəslin düzgün tərbiyəsi baxımından mühüm rol oynayırlar. Onların fəaliyyəti milli dövlətçilik ənənələrinin davam etdirilməsinə də töhfə verir.

Müraciətdə qeyd olunub ki, bu gün Ağsaqqallar Şurası ölkənin ictimai və humanitar həyatında aktiv iştirak edir və cəmiyyət üçün vacib məsələlərin həllinə dəstək göstərir.

Dövlət başçısı qurultayın işinə uğurlar arzulayaraq, qəbul ediləcək qərarların təşkilatın fəaliyyətinin daha da inkişafına xidmət edəcəyini bildirib.