Azərbaycan Müdafiə Nazirliyinin nümayəndə heyəti ölkələr arasında hərbi sahədə əlaqələrin genişləndirilməsi məqsədilə Çin Xalq Respublikasınə səfər edib.

RealMedia.info xəbər verir ki, bu barədə Azərbaycan Müdafiə Nazirliyi məlumat yayıb.

Səfər çərçivəsində Çin Xalq Respublikası Milli Müdafiə Nazirliyinin Beynəlxalq Hərbi Əməkdaşlıq Baş İdarəsində “Hərbi əməkdaşlıq sahəsində perspektivlərin müzakirə edilməsi” mövzusunda işçi görüş keçirilib.

Görüş zamanı tərəflər arasında hərbi əməkdaşlığın mövcud vəziyyəti, inkişaf perspektivləri və gələcək planlar ətrafında geniş fikir mübadiləsi aparılıb. Eyni zamanda qarşılıqlı maraq doğuran bir sıra əməkdaşlıq istiqamətləri müzakirə olunub.

Tərəflər ötən il üzrə müəyyən edilmiş əməkdaşlıq planında nəzərdə tutulan tədbirlərin icrasını müsbət qiymətləndirib, cari il üçün planlaşdırılan fəaliyyətlərin həyata keçirilməsi məsələlərinə də toxunublar.

Bundan əlavə, görüşdə Azərbaycan ilə Çin Xalq Respublikası arasında hərbi sahədə təcrübə və informasiya mübadiləsinin əhəmiyyəti xüsusi vurğulanıb.

Qeyd edilib ki, əsas məqsəd iki ölkənin müdafiə qurumları arasında mövcud əlaqələrin daha da möhkəmləndirilməsi və əməkdaşlığın genişləndirilməsidir.