Prezident İlham Əliyevin sərəncamı ilə Cavidan Rizvan oğlu Hüseynov Azərbaycan Respublikasının Bəhreyn Krallığında fövqəladə və səlahiyyətli səfiri təyin edilib.

Cavidan Hüseynov 1 aprel 1972-ci ildə Bakı şəhərində anadan olub. 1989–1994-cü illərdə Bakı Dövlət Universitetinin Hüquq fakültəsində təhsil alıb. 2007-ci ildə hüquq elmləri namizədi elmi dərəcəsinə layiq görülüb.

O, əmək fəaliyyətinə 1994-cü ildə Xarici İşlər Nazirliyinin Dövlət Protokolu İdarəsində referent kimi başlayıb. 1999–2000-ci illərdə nazirliyin Konsulluq İdarəsində attaşe, 2000–2003-cü illərdə üçüncü katib, 2003–2004-cü illərdə isə ikinci katib vəzifələrində çalışıb. 2004–2006-cı illərdə həmin idarədə şöbə müdiri olub.

2006-cı ildə Azərbaycanın Rusiyadakı səfirliyində şöbə müdiri – birinci katib kimi fəaliyyət göstərib. 2006–2010-cu illərdə Xarici İşlər Nazirliyinin Konsulluq İdarəsində müşavir, 2010–2018-ci illərdə isə idarə rəisinin müavini vəzifəsində çalışıb.

2018-ci ildə ona ikinci dərəcəli fövqəladə və səlahiyyətli elçi diplomatik rütbəsi verilib. Həmin ildən etibarən Birləşmiş Ərəb Əmirliklərinin Dubay şəhərində Azərbaycan Respublikasının baş konsulu vəzifəsində xidmət edib.

Cavidan Hüseynov ailəlidir, üç övladı var.