Türkiyə Prezidenti Rəcəb Tayyib Ərdoğan Suriyadakı vəziyyətlə bağlı mühüm açıqlamalar verib. Dövlət başçısı bildirib ki, Suriyanı uzun illər “Yaxın Şərq bataqlığı” kimi təqdim edən və Türkiyənin təhlükəsizliyinin bu ölkə ilə əlaqəli olduğunu qəbul etməyən dairələr bu gün də eyni yanlış mövqedə qalmaqdadır.

“Report”un məlumatına görə, Ərdoğan bu fikirləri ölkə vətəndaşlarına müraciəti zamanı səsləndirib. O qeyd edib ki, artıq 13 ildir Suriyada baş verən hadisələri düzgün analiz edə bilməyən qüvvələr indiki mərhələdə də reallıqları görmək istəmir.

Prezident vurğulayıb ki, Türkiyə yalnız öz təhlükəsizliyini deyil, eyni zamanda Suriya da daxil olmaqla region ölkələrində sülhün və sabitliyin bərqərar olunmasını prioritet hesab edir. Onun sözlərinə görə, Ankara regionda davamlı sülh üçün məsuliyyətli və qətiyyətli siyasət yürütməkdə davam edəcək.