Nazirlər Kabineti “Ölçmələrin vəhdətinin təmin edilməsinin dövlət tənzimlənməsinə aid olan metodikalarının (metodlarının) attestasiyası və tətbiqi Qaydası”nda dəyişiklik edib.

Məlumata görə, bununla bağlı Baş nazir Əli Əsədov yeni qərar imzalayıb.

Qərara əsasən, ölçmə metodikalarının attestasiyası haqqında şəhadətnamələrin yaradılması, qeydiyyatı, qüvvəsinin dayandırılması, bərpası, ləğv edilməsi və yenidən rəsmiləşdirilməsi Agentliyin Keyfiyyət informasiya sistemi vasitəsilə həyata keçiriləcək.

Yeni dəyişikliklərə görə, attestasiya haqqında şəhadətnamə hüquq sahibinin istəyindən asılı olaraq elektron formada, o cümlədən elektron poçt vasitəsilə və ya kağız daşıyıcıda təqdim ediləcək.

Bundan başqa, attestasiya şəhadətnamələrinin qeydiyyatı aidiyyəti agentlik tərəfindən aparılacaq və sənəd üç gün müddətində hüquq sahibinə təqdim olunacaq.

Qərarla eyni zamanda “Ölçmələrin vəhdətinin təmin edilməsi üzrə dövlət məlumat fondunun təşkili və aparılması, məlumatların fonda verilməsi, fonddan sənədlərin və məlumatların təqdim edilməsi Qaydası”na da dəyişiklik edilib.

Yeni qaydalara əsasən, dövlət məlumat fondu ölçmələrin vəhdətinin təmin olunması sahəsində hüquqi aktlar, beynəlxalq müqavilələr, dövlət etalonları, standart nümunələr, təsdiq edilmiş ölçmə vasitələri və attestasiya olunmuş metodikalar barədə məlumatları özündə birləşdirəcək.

Məlumat fondunun təşkili və idarə olunması isə Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi tərəfindən həyata keçiriləcək.