Dünən Sumqayıt şəhərində yerləşən 33 nömrəli tam orta məktəbdə insident baş verib. İlkin məlumata görə, 14 yaşlı şagird sinif yoldaşı tərəfindən döyülüb.

Realmedia xəbər verir ki, hadisə ilə bağlı Sumqayıt Tibb Mərkəzi “Oxu.az”ın sorğusuna cavab olaraq açıqlama yayıb.

Məlumatda bildirilib ki, 2012-ci il təvəllüdlü oğlan uşağı Sumqayıt Tibb Mərkəzinin Uşaq Xəstəxanasına hospitalizasiya olunub.

“Pasiyentə dəqiqləşdirilməmiş kəllə-beyin travması diaqnozu qoyulub. Ona zəruri tibbi xidmətlər göstərilib. Hazırda həkim müşahidəsi altında müalicəsi davam etdirilir, vəziyyəti stabildir”, – deyə açıqlamada qeyd olunub.

Məsələ ilə bağlı Daxili İşlər Nazirliyinin Mətbuat Xidmətinin əməkdaşı Elbrus İbrahimov da açıqlama verib. O bildirib ki, məktəblərin birində iki şagird arasında mübahisə yaranması barədə polisə məlumat daxil olub.

Faktla bağlı müvafiq ekspertiza təyin edilib və hazırda ərazi polis orqanında araşdırma aparılır.