Rusiya Xarici İşlər Nazirliyinin rəsmisi Vladislav Maslennikov Ermənistanın Avropa İttifaqı ilə yaxınlaşmasının Moskva ilə müttəfiqlik münasibətlərinə mənfi təsir göstərə biləcəyini bəyan edib.

Realmedia xəbər verir ki, Maslennikovun sözlərinə görə, Ermənistanın Aİ-yə doğru atdığı addımlar postsovet məkanında mövcud inteqrasiya proseslərinə də ziddir. O bildirib ki, Brüssel İrəvanı siyasi motivlər əsasında Avropa İttifaqının standartlarını qəbul etməyə təşviq edir.

Rusiya XİN rəsmisi vurğulayıb ki, bu proses Ermənistanın Avrasiya İqtisadi Birliyindəki üzvlüyü ilə açıq şəkildə ziddiyyət təşkil edir. Onun fikrincə, Avropa İttifaqı ilə Avrasiya İqtisadi Birliyinə eyni vaxtda üzv olmaq mümkün deyil.

Maslennikov qeyd edib ki, bu cür seçimlər Ermənistan üçün uzunmüddətli siyasi və iqtisadi nəticələr doğura bilər və Rusiya tərəfi bu prosesi diqqətlə izləyir.