Füzuli rayonu 33 nömrəli tam orta məktəbin keçmiş direktoru Mədinə Hallacova işdən çıxarılmasının qanunsuz olduğunu iddia edib.
RealMedia.info xəbər verir ki, Mədinə Hallacovanın sözlərinə görə, sosial şəbəkələrdə rəhbərlik etdiyi məktəbdə mövcud problemlərlə bağlı tənqidi paylaşımlar etməsi və təhsil müəssisəsində yazılı əmr olmadan aparılan yoxlamalara etiraz göstərməsi onun işdən azad olunmasına səbəb olub.
O bildirib ki, Məktəbəqədər və Ümumi Təhsil üzrə Dövlət Agentliyinin direktoru Eşqi Bağırovun imzaladığı əmrlə onunla bağlanmış əmək müqaviləsinə Azərbaycan Respublikasının Əmək Məcəlləsinin 70-ci maddəsinin “ç” bəndinə əsasən xitam verilib.
Keçmiş direktor qeyd edib ki, haqqında tərtib olunduğu bildirilən aktlar ona təqdim edilməyib və bu sənədlərin hansı şəraitdə hazırlandığı barədə məlumat verilməyib. Onun sözlərinə görə, məktəbdə mövcud olan texniki problemləri və digər çatışmazlıqları sosial şəbəkələrdə ictimailəşdirdikdən sonra ona qarşı təzyiqlər artıb.
Mədinə Hallacova həmçinin bildirib ki, təhsil aldığı ixtisasartırma proqramı və istifadə olunmamış məzuniyyət günləri ilə bağlı elektron qaydada müraciət etsə də, sonradan iş yerində olmaması ilə bağlı akt tərtib olunub.
Məsələ ilə bağlı Qarabağ Regional Təhsil İdarəsi isə bildirib ki, Mədinə Hallacova əmək funksiyalarını və əmək müqaviləsi üzrə öhdəliklərini yerinə yetirməyib, etik davranış qaydalarını və aidiyyəti təlimatların tələblərini pozub.
İdarənin açıqlamasında qeyd olunub ki, nəticədə məktəbdə təlim-tərbiyə prosesi, əmək və icra intizamı pozulub, ümumi təhsil prosesinin iştirakçılarının hüquqlarına və qanunla qorunan mənafelərinə ziyan dəyib. Bu səbəbdən onun barəsində intizam tənbeh tədbiri tətbiq edilərək əmək müqaviləsinə xitam verilib.
Məsələ ilə bağlı mübahisə tərəflərin fərqli mövqeləri fonunda gündəmdə qalmaqdadır.