Sosial şəbəkələrdə uşaqların istifadəsinə nəzarət məqsədilə yaş təsdiqetmə mexanizmləri daha ciddi şəkildə tətbiq olunmalıdır.

Bu fikri Milli Məclisin Elm və təhsil komitəsinin üzvü Elnarə Akimova açıqlamasında bildirib.
Deputatın sözlərinə görə, əgər 15 yaşadək uşaqların sosial şəbəkələrdən istifadəsi qanunla məhdudlaşdırılarsa, ilk nəzarət vasitəsi texniki mexanizmlər olacaq:

“Bu, telefon nömrəsi, şəxsiyyəti təsdiq edən sənəd və ya valideyn razılığı üzərindən həyata keçirilə bilər. Ancaq reallıq göstərir ki, uşaqlar texniki məhdudiyyətləri aşmaqda kifayət qədər çevikdirlər”.

Elnarə Akimova qeyd edib ki, uşaqlar valideyn məlumatları ilə hesab açmaq, yaş göstəricisini dəyişmək və ya alternativ platformalara keçmək kimi yollarla məhdudiyyətləri aşa bilirlər.

Deputatın fikrincə, bu səbəbdən yalnız platformalara məsuliyyət yükləmək effektiv nəzarət üçün kifayət deyil:

“Risk hər zaman qalacaq. Ona görə də təkcə platformalara məsuliyyət yükləmək effektiv nəzarət demək deyil”.