Azərbaycan Respublikasının Prezidenti İlham Əliyev iyunun 19-da Rusiya Federasiyasının Dağıstan Respublikasının tanınmış ictimai-siyasi xadimi Qurban Qurbanovu qəbul edib və ona "Dostluq" ordenini təqdim edib.

Realmedia.info xəbər verir ki, dövlət başçısı görüş zamanı Qurban Qurbanovu yubileyi münasibətilə təbrik edərək ona və ailəsinə xoş arzularını çatdırıb.

Prezident İlham Əliyev Qurban Qurbanovun ailəsinin həm Azərbaycanda, həm də Dağıstanda böyük hörmət qazandığını vurğulayaraq, mərhum Səid Camaloviç Qurbanov ilə bağlı xatirələrini bölüşüb. Dövlət başçısı Heydər Əliyevlə Səid Camaloviç arasında mövcud olmuş səmimi dostluq münasibətlərinin Azərbaycan və Dağıstan xalqları arasında qardaşlıq əlaqələrinin möhkəmlənməsində mühüm rol oynadığını qeyd edib.

Prezident bildirib ki, Azərbaycan və Dağıstan xalqlarını ortaq tarix, qohumluq bağları, coğrafi yaxınlıq və ümumi gələcək birləşdirir. O, xalqlar arasında sıx münasibətlərin Qafqaz regionunda sabitlik, inkişaf və tərəqqi üçün mühüm əhəmiyyət daşıdığını diqqətə çatdırıb.

Dövlət başçısı çıxışında babası, tanınmış dövlət xadimi Əziz Əliyevin Dağıstan üçün gördüyü xidmətləri də xatırladıb. İlham Əliyev qeyd edib ki, Əziz Əliyevin xatirəsi Dağıstanda bu gün də böyük ehtiramla yad edilir və bu, onun üçün xüsusi qürur mənbəyidir.

Daha sonra Prezident İlham Əliyev Qurban Qurbanovun Azərbaycan ilə Dağıstan arasında dostluq və əməkdaşlıq əlaqələrinin inkişafına verdiyi töhfələri yüksək qiymətləndirərək onun "Dostluq" ordeni ilə təltif olunması barədə imzaladığı sərəncamı xatırladıb və ordeni şəxsən təqdim edib.

Qurban Qurbanov göstərilən yüksək diqqətə və təltifə görə Prezident İlham Əliyevə təşəkkür edib. O, atası Səid Camaloviç Qurbanov ilə ümummilli lider Heydər Əliyev arasında olan dostluq münasibətlərinin Azərbaycan, Rusiya və Dağıstan arasında əlaqələrin inkişafında mühüm rol oynadığını vurğulayıb.

Qurban Qurbanov, həmçinin Dağıstanda Əziz Əliyevin xatirəsinə böyük hörmət bəsləndiyini qeyd edərək, onun adını daşıyan küçələrin və abidələrin mövcud olduğunu bildirib. O, Dağıstan rəhbərliyinin Heydər Əliyevin xatirəsinin əbədiləşdirilməsi istiqamətində həyata keçirilən layihələrə daim dəstək verdiyini də diqqətə çatdırıb.