Ukrayna Prezidenti Volodimir Zelenskinin xarici səfərləri zamanı istifadə etdiyi marşrutda dəyişiklik etdiyi bildirilir.

Ukrayna mətbuatının yaydığı məlumata görə, dövlət başçısı əvvəllər Avropa ölkələrinə səfərləri zamanı əsasən Polşadakı Jeşuv-Yasyonka Beynəlxalq Hava Limanından istifadə edirdi. Lakin Zelenski iyunun 7-də Böyük Britaniyaya səfəri zamanı Moldovanın paytaxtı Kişineu üzərindən Londona yollanıb.

Marşrutun dəyişdirilməsinin rəsmi səbəbi açıqlanmasa da, yerli media bunu son dövrlər Polşa və Ukrayna arasında müşahidə olunan siyasi gərginliklə əlaqələndirir.

Məlumata görə, may ayının sonunda Zelenskinin Ukrayna Silahlı Qüvvələrinin bir bölməsinə "UPA qəhrəmanları" fəxri adının verilməsi barədə qərarı Varşavada narazılıqla qarşılanıb. Polşa tərəfi bu addımı iki ölkə arasındakı həssas tarixi məsələlər fonunda yanlış qərar kimi qiymətləndirib.

Polşa Seyminin vitse-spikeri Kşiştof Bosak da məsələ ilə bağlı sərt açıqlamalar verərək Zelenskinin addımını tənqid edib. O, Ukraynaya maliyyə və siyasi dəstəyin yenidən nəzərdən keçirilməsinin vacibliyini vurğulayıb.

Ekspertlər hesab edirlər ki, tarixi mövzular ətrafında yaranan fikir ayrılıqları Kiyev-Varşava münasibətlərində yeni gərginlik mərhələsinə səbəb ola bilər. Bununla belə, tərəflər arasında əməkdaşlığın gələcək istiqaməti qarşıdakı dövrdə veriləcək siyasi qərarlardan asılı olacaq.