Azərbaycan inklüziv və dayanıqlı inkişafı davam etdirir. Son iki onillik ərzində ölkə iqtisadiyyatı təxminən dörd dəfə artıb, yoxsulluq və işsizlik səviyyəsi isə təqribən 5 faizə enib.

Realmedia.info xəbər verir ki, bu fikirlər Azərbaycan Respublikasının Prezidenti İlham Əliyev tərəfindən BMT-nin Asiya və Sakit Okean üzrə İqtisadi və Sosial Komissiyasının (BMT ESCAP) 82-ci sessiyasının iştirakçılarına ünvanlanan müraciətdə yer alıb.

Dövlət başçısı bildirib ki, sosial müdafiə və infrastruktur sahələrinə yatırılan böyük sərmayələr 10 milyondan çox əhalinin rifahının yaxşılaşdırılmasına xidmət edir. Azərbaycan BMT-nin 2030-cu il Dayanıqlı İnkişaf Gündəliyini milli strategiyalara inteqrasiya edərək yoxsulluğun azaldılması, təhsil və səhiyyə sahələrində mühüm nailiyyətlər əldə edib və “heç kəsi diqqətdən kənarda qoymamaq” prinsipinə sadiqliyini davam etdirir.

İlham Əliyev qeyd edib ki, Azərbaycan mütəmadi olaraq könüllü milli hesabatlar təqdim edərək Dayanıqlı İnkişaf Məqsədlərinin icrasında ciddi irəliləyiş əldə edib.

Müraciətdə həmçinin Orta Dəhlizin artan strateji əhəmiyyəti vurğulanıb. Zəngəzur dəhlizinin Asiyanı Avropa ilə birləşdirərək regionda nəqliyyat, enerji və rəqəmsal bağlantıları gücləndirəcəyi qeyd olunub.
Prezident Azərbaycanın enerji təhlükəsizliyinə töhfə verdiyini, müxtəlif bölgələrdə sabit və şaxələndirilmiş enerji təchizatında etibarlı tərəfdaş kimi çıxış etdiyini bildirib.

Sənəddə vurğulanıb ki, münaqişənin başa çatması ölkənin beynəlxalq fəaliyyət imkanlarını genişləndirib. Azərbaycanın Türk Dövlətləri Təşkilatı və digər beynəlxalq platformalarda aktivliyi, həmçinin COP29-a ev sahibliyi ölkənin qlobal nüfuzunun artmasının göstəricisidir.