Azərbaycan Respublikasının Prezidenti İlham Əliyev BMT-nin Asiya və Sakit Okean üzrə İqtisadi və Sosial Komissiyasının (BMT ASİSK) 82-ci sessiyasının iştirakçılarına müraciət ünvanlayıb.

Realmedia.info xəbər verir ki, müraciət President.az saytına istinadən təqdim olunub.

Müraciətdə qeyd olunur ki, BMT ESCAP dayanıqlı inkişafın təşviqi, regional əlaqələrin gücləndirilməsi, ticarət və iqtisadi əməkdaşlığın genişləndirilməsi baxımından BMT-nin ən mühüm regional platformalarından biridir. Azərbaycan bu proseslərə töhfə verməkdən məmnun olduğunu bildirib.

Dövlət başçısı çıxışında qlobal qeyri-müəyyənliklər, geosiyasi gərginliklər və münaqişələrin beynəlxalq təhlükəsizliyə təsirlərindən bəhs edib, dövlətlərin suverenliyi və ərazi bütövlüyü prinsiplərinə sadiqliyi bir daha vurğulayıb.

İlham Əliyev bildirib ki, 2021-ci ildən sonra Cənubi Qafqazda mühüm dəyişikliklər baş verib, Azərbaycan öz ərazi bütövlüyünü tam bərpa edib və Ermənistanla sülh gündəliyinə start verilib. Vaşinqtonda keçirilən zirvə görüşündə əldə olunan razılaşmaların normallaşma prosesində mühüm irəliləyiş olduğu qeyd edilib.

Müraciətdə həmçinin Qarabağ və Şərqi Zəngəzurda aparılan genişmiqyaslı bərpa-quruculuq işləri, “Böyük Qayıdış” proqramı və 80 mindən çox insanın doğma yurdlarına dönüşü barədə məlumat verilib. Bununla yanaşı, mina problemi humanitar təhlükə kimi qiymətləndirilib.

Prezident iqtisadi göstəricilərə də toxunaraq, Azərbaycanın son 20 ildə iqtisadiyyatının təxminən dörd dəfə artdığını, yoxsulluq və işsizliyin 5 faiz səviyyəsinə endiyini qeyd edib.
Sənəddə Orta Dəhlizin və Zəngəzur dəhlizinin regional əlaqələrdə əhəmiyyəti, Azərbaycanın enerji təhlükəsizliyinə töhfəsi və beynəlxalq təşkilatlarda artan roluna da diqqət çəkilib.

Sonda Prezident İlham Əliyev ölkənin gələcəkdə keçiriləcək Ümumdünya Şəhərsalma Forumunun 13-cü sessiyasına ev sahibliyi edəcəyini qeyd edərək iştirakçıları tədbirə dəvət edib.