Ailə, Qadın və Uşaq Problemləri üzrə Dövlət Komitəsinin sədri Bahar Muradova qadın sahibkarlığının inkişafının əhəmiyyətindən danışıb.

Realmedia.info xəbər verir ki, o, bu fikirləri Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) “AQEM məkanında davamlı inkişaf naminə qadınların səslərinin gücləndirilməsi” mövzusunda beynəlxalq konfransı çərçivəsində təşkil olunan “Qadın sahibkarlığın inkişafı və qanunvericiliyin təkmilləşdirilməsi” adlı tədbirdə çıxışı zamanı səsləndirib.

Bahar Muradova bildirib ki, qadınların iqtisadi fəaliyyətə cəlb olunması inklüziv və davamlı inkişafın əsas prioritetlərindən biridir və sosial rifahın yüksəldilməsində mühüm rol oynayır.
Onun sözlərinə görə, qadın sahibkarlığı yeni iş yerlərinin yaradılmasına, ailə gəlirlərinin artmasına və ümumilikdə iqtisadi dayanıqlığın güclənməsinə töhfə verir.

Komitə sədri qeyd edib ki, qadın sahibkarlığının təşviqi həm gender bərabərliyi, həm də strateji iqtisadi inkişaf baxımından vacib istiqamətlərdən biridir.

O həmçinin vurğulayıb ki, AQEM çərçivəsində ilk dəfə olaraq hökumət və parlament nümayəndələrinin birlikdə təşəbbüs irəli sürməsi qadın sahibkarlığının müzakirəsinə yeni imkanlar açır.