Əlverişsiz meteoroloji şəraitlə əlaqədar olaraq “Azərbaycan Hava Yolları” QSC (AZAL) Moskva istiqaməti üzrə yerinə yetirilən reyslərin icrasında müvəqqəti dəyişikliklər edib.

Bu barədə AZAL-dan Realmedia-ya bildirilib.
Məlumata görə, Bakı–Moskva (Vnukovo)–Bakı marşrutu üzrə J2-805 və J2-806 nömrəli reyslər ləğv olunub.

Qeyd edilib ki, sərnişinlərin rahatlığını təmin etmək məqsədilə AZAL mövcud qaydalara uyğun olaraq operativ tədbirlər həyata keçirib. Belə ki, sərnişinlərə alternativ uçuş imkanları təqdim olunub, müvafiq hallarda isə biletlərin dəyəri geri qaytarılıb.

Ləğv edilmiş reyslərin sərnişinlərinin bir qismi AZAL-ın J2-809 və J2-810 nömrəli reysləri ilə təyinat məntəqəsinə çatdırılıb. Moskvada olan və alternativ uçuşlardan istifadə etməyən sərnişinlər üçün isə bilet vəsaitinin tam şəkildə geri qaytarılması təmin edilib.
AZAL yaranmış vəziyyətə görə üzr istəyib və anlayış göstərdiklərinə görə sərnişinlərinə təşəkkür edib.