Moskva vilayətinin Balaşixa şəhərində avtomobilin partlaması nəticəsində bir nəfər həyatını itirib.

Realmedia.info xəbər verir ki, bu barədə Rusiya İstintaq Komitəsinin (İK) mətbuat xidməti məlumat yayıb.

Məlumata görə, hadisə iyunun 9-da səhər saat 05:30 radələrində hərəkətdə olan “BMW X3” markalı avtomobildə baş verib. Nəqliyyat vasitəsində partlayıcı qurğunun işə düşməsi nəticəsində güclü partlayış qeydə alınıb.

İlkin məlumatlara əsasən, hadisə zamanı sürücü ağır bədən xəsarətləri alaraq hadisə yerində həyatını itirib.

Hadisə ilə bağlı cinayət işi açılıb, əraziyə istintaq-əməliyyat qrupu və kriminalistlər cəlb olunub. Hazırda mütəxəssislər hadisə yerinə baxış keçirir, partlayışın səbəbləri araşdırılır.

Qeyd edək ki, yaxın zamanda tibbi və partlayış-texniki ekspertizaların təyin ediləcəyi bildirilir.

Xatırladaq ki, 2025-ci ilin aprel ayında da eyni bölgədə oxşar partlayış hadisəsi baş vermişdi.