Azərbaycan Dövlət Neft və Sənaye Universitetinin (ADNSU) rektoru Rüfət Əzizovun rəhbərlik etdiyi nümayəndə heyəti "Balakhani Operating Company LTD" (BOC) hasilat şirkətində olub.

Realmedia.info xəbər verir ki, səfər çərçivəsində universitetin professor-müəllim heyəti tarixi Balaxanı mədənləri ilə tanış olub, burada tətbiq olunan müasir hasilat texnologiyaları və şirkətin dayanıqlı fəaliyyət prinsipləri barədə ətraflı məlumat əldə edib.

Daha sonra BOC-un baş qərargahında keçirilən görüşdə akademik Musa Əliyevin adını daşıyan geologiya elmləri üzrə tədqiqat təqaüdünün təsis olunmasına dair sənəd imzalanıb. Təqaüd proqramının məqsədi görkəmli alimin elmi irsinin yaşadılması, geologiya sahəsində yeni tədqiqatların dəstəklənməsi və elm-sənaye əməkdaşlığının gücləndirilməsidir.

Tədbirdə akademik Musa Əliyevin ailə üzvləri, "Ömrüm" kitabının müəllifi Cəmilə Paşayeva-Seyidzadə və alimin nəticəsi Mir Musa Seyidzadə də iştirak ediblər. Çıxış edən Cəmilə Paşayeva-Seyidzadə akademik Musa Əliyevin Azərbaycan geologiya elminin inkişafındakı mühüm xidmətlərindən danışaraq, onun elmi məktəbinin bu gün də yaşadığını vurğulayıb.

BOC-un prezidenti Rövşən Rzayev bildirib ki, ADNSU ilə əməkdaşlıq şirkət üçün xüsusi əhəmiyyət daşıyır. Onun sözlərinə görə, geologiya sahəsində yeni elmi araşdırmaların dəstəklənməsi Azərbaycanın enerji sahəsində yalnız hasilat ölkəsi deyil, həm də mühüm elmi mərkəz kimi tanınmasına töhfə verəcək.

ADNSU-nun rektoru Rüfət Əzizov isə çıxışında universitet və sənaye müəssisələri arasında əməkdaşlığın yüksəkixtisaslı kadr hazırlığında mühüm rol oynadığını qeyd edib. O, tələbələrin istehsalat mühitində qazandıqları təcrübənin onların peşəkar inkişafına ciddi təsir göstərdiyini bildirib.

Tədbirdə qeyd olunub ki, ADNSU ilə BOC arasında uzunmüddətli əməkdaşlıq əlaqələri mövcuddur. İndiyədək 100-ə yaxın universitet tələbəsi şirkətdə istehsalat təcrübəsi keçərək nəzəri biliklərini praktiki bacarıqlarla zənginləşdirib.

Səfərin sonunda BOC-da təcrübə keçən ADNSU tələbələri təltif olunub, fərqlənən beş tələbəyə isə şirkətdə müxtəlif vəzifələr üzrə iş təklifləri təqdim edilib.

Qonaqlar daha sonra Vətən uğrunda şəhid olmuş qəhrəman neftçilərin abidəsini ziyarət edərək şəhidlərin xatirəsini ehtiramla yad ediblər.