Gəncə şəhərində köhnə yataqxana fondunun yenilənməsi istiqamətində mühüm addımlar atılır. Şəhərdə fəaliyyət göstərən Mənzil Kommunal Təsərrüfatı İstehsalat Birliyinin balansında hazırda 19 yataqxana binası mövcuddur.

Məlumata görə, bu binalarda ümumilikdə 1623 otaq yerləşir və həmin otaqlarda 4683 nəfər sakin yaşayır. Uzun illər istismarda olan yataqxanaların əksəriyyəti artıq texniki baxımdan köhnəlib və müasir tələblərə cavab vermir.

Sakinlərin daha rahat və təhlükəsiz yaşayış şəraiti ilə təmin olunması məqsədilə yeni layihələrin icrasına başlanılıb. Bu çərçivədə şəhərin Kimyaçılar küçəsi ilə Nizami Gəncəvi prospekti kəsişməsində yeni yaşayış kompleksi inşa edilib.
Layihə üzrə üç ədəd 9 mərtəbəli və bir ədəd 10 mərtəbəli bina tikilib. Yeni kompleksdə ümumilikdə 249 mənzil mövcuddur və mənzillər müasir infrastruktura uyğun şəkildə layihələndirilib.

Bildirilir ki, hazırda yataqxanalarda yaşayan sakinlərin mərhələli şəkildə bu mənzillərə köçürülməsi planlaşdırılır. Köçürülmə prosesinin yaxın vaxtlarda başlanacağı və sosial həssas qrupların nəzərə alınacağı qeyd olunur.