Dünyada baş verən münaqişələr ölkələrarası ixracat proseslərinə ciddi təsir göstərir. Bu fikirləri Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Antalya Diplomatiya Forumu çərçivəsində keçirilən panel müzakirə zamanı səsləndirib.

Onun sözlərinə görə, hazırkı geosiyasi gərginliklər beynəlxalq ticarət marşrutlarının təhlükəsizliyini və davamlılığını sual altına alır. Bu baxımdan Orta Dəhlizin əhəmiyyəti daha da artır.

Əmirbəyov qeyd edib ki, Cənubi Qafqaz regionunda artıq yalnız iqtisadi maraqlar deyil, eyni zamanda sülhün təmin olunması da prioritet məsələyə çevrilib:

“Biz sadəcə ticarəti düşünmürük, paralel olaraq sülhün möhkəmlənməsini də hədəfləyirik. Bölgəmizdə onillər boyu davam edən münaqişələr mövcud idi. Bu gün isə de-fakto olaraq Ermənistan ilə sülh şəraitində yaşayırıq və bu, yeni imkanlar yaradır”.

Xüsusi nümayəndə Zəngəzur dəhlizi layihəsinin də əhəmiyyətinə toxunaraq bildirib ki, bu marşrut yalnız Azərbaycan ilə Naxçıvan arasında əlaqə yaratmaqla kifayətlənməyəcək:

“Zəngəzur koridoru reallaşdıqdan sonra Asiya ilə Avropa arasında mühüm nəqliyyat bağlantısına çevriləcək”.
Sonda vurğulanıb ki, uzun illər münaqişələrlə yadda qalan Cənubi Qafqaz regionu artıq əməkdaşlıq, sabitlik və rifah istiqamətində inkişaf edən bir məkan kimi formalaşmaqdadır.