Gürcüstan-Azərbaycan sərhədi yaxınlığında Türkiyəyə məxsus C-130 hərbi yük təyyarəsinin qəzaya uğramasında heç bir xarici müdaxilə və ya partlayıcı maddə izi aşkar edilməyib.

Realmedia.info xəbər verir ki, bu barədə "Anadolu Ajansı" məlumat yayıb. Ankara Baş Prokurorluğu, Hərbi Cinayətlərin İstintaq Bürosu 11 noyabr 2025-ci ildə Gürcüstanın Kaxeti bölgəsində qəzaya uğrayan və 20 əsgərin ölümünə səbəb olan Hərbi Hava Qüvvələri Komandanlığına məxsus "68-1609" nömrəli C-130 təyyarəsi ilə bağlı araşdırmanı davam etdirir.

Hesabatda bildirilib ki, qəza yerindən dəlillərin toplanması, qalıqların müayinəsi və şahid ifadələrinin alınmasını əhatə edən istintaqda beynəlxalq prosedurlara əməl olunub. İkitərəfli müqavilələrə uyğun olaraq, Gürcüstan hakimiyyəti ilə koordinasiya nəticəsində sübutlar Türkiyəyə tam və dəqiq çatdırılıb.

Təyyarənin yaxınlığında hər hansı sursatın qəlpə izləri və ya zədə izləri tapılmayıb. Kustar üsullu və ya digər hər hansı partlayıcı qurğu, onun komponentlərindən qaynaqlanan partlayış izləri aşkarlanmayıb. Sənəddə həmçinin neft törəmələri, yanğını sürətləndirən maddələr və şübhəli kimyəvi maddələrin də tapılmadığı qeyd olunub.