Rusiya Federasiyası İstintaq Komitəsi “Azərbaycan Hava Yolları”na (AZAL) məxsus Embraer-190 tipli sərnişin təyyarəsinin Qazaxıstan ərazisində qəzaya uğraması ilə bağlı aparılan istintaqın başa çatdırıldığını açıqlayıb.
Realmedia.az xəbər verir ki, bu barədə Rusiya İstintaq Komitəsinin sədri Aleksandr Bastrıkin Azərbaycan Respublikasının Baş prokuroru Kamran Əliyevə ünvanladığı rəsmi məktubda məlumat verib.
Məlumata görə, 25 dekabr 2024-cü il tarixində Bakıdan Qroznıya uçan təyyarə əlverişsiz hava şəraiti səbəbindən Qroznı hava limanına iki dəfə uğursuz eniş cəhdi edib. Bundan sonra ekipaj ehtiyat hava limanı kimi Qazaxıstanın Aktau şəhərinə yönəlib. Təyyarə eniş zamanı yerə çırpılıb, nəticədə hava gəmisi dağılıb və yanğın baş verib.
Qəza nəticəsində 38 nəfər həlak olub, 29 nəfər isə müxtəlif dərəcəli bədən xəsarətləri alıb.
Aparılan istintaq və toplanmış sübutlar əsasında cinayət işinə xitam verildiyi bildirilib. Eyni zamanda zərərçəkənlərə və həlak olanların ailələrinə kompensasiya və sığorta ödənişlərinin Rusiya qanunvericiliyinə və beynəlxalq öhdəliklərə uyğun şəkildə həyata keçirildiyi qeyd olunub.
Bununla yanaşı, hadisənin səbəblərinin tam və obyektiv araşdırılması məqsədilə kompleks aviasiya-texniki ekspertiza təyin edildiyi, ekspertizanın nəticələrindən asılı olaraq işə yenidən baxılmasının mümkün olduğu vurğulanıb.