Böyük Britaniyanın Birminhem şəhərində və ətraf ərazilərdə ötən axşam saatlarında səmanın qeyri-adi çəhrayı-bənövşəyi rəngə boyanması əhali arasında geniş maraq və çaşqınlıq yaradıb.

Realmedia xəbər verir ki, sosial şəbəkələrdə sürətlə yayılan görüntülər bir çox istifadəçi tərəfindən fövqəltəbii hadisə və ya nadir atmosfer effekti kimi şərh edilib.

Məlumata görə, hadisə 2026-cı ilin yanvarında “Goretti” fırtınası zamanı müşahidə olunan qar yağışı və sıx buludlu hava şəraitində baş verib.

Sonradan açıqlanan rəsmi məlumatlarda bildirilib ki, səmanın bu cür rəng almasına səbəb “Birmingham City” futbol klubunun stadionunda ot örtüyünün yaxşılaşdırılması üçün quraşdırılmış xüsusi LED böyümə lampalarının işığı olub. Həmin işıq qarla örtülmüş buludlara əks olunduqda səma çəhrayı-bənövşəyi rəngdə görünüb.

Qeyd edək ki, bu cür işıq effektləri daha əvvəl də müxtəlif ölkələrdə güclü LED işıqlandırma sistemlərinin istifadə edildiyi ərazilərdə müşahidə olunub.