İsrail Müdafiə Ordusu (SAXAL) Qəzza zolağının cənubunda hava əməliyyatı həyata keçirdiyini açıqlayıb.

Realmedia.info xəbər verir ki, bu barədə İsrail ordusunun mətbuat xidməti məlumat yayıb.

Bildirilib ki, iyunun 6-na keçən gecə həyata keçirilən əməliyyatın məqsədi HƏMAS-ın hərbi qanadına aid qrupdan qaynaqlanan təhlükəni zərərsizləşdirmək olub.

SAXAL-ın məlumatına görə, hava zərbəsi nəticəsində həmin bölmənin komandiri olduğu iddia edilən Muhanad Osman Yasin Farvana öldürülüb.

İsrail tərəfi Farvananın müharibə dövründə, eləcə də son günlərdə İsrail ordusuna və İsrail dövlətinə qarşı hücum planlarının hazırlanmasında iştirak etdiyini iddia edir.

Ordunun yaydığı açıqlamada qeyd olunub ki, onun fəaliyyəti bölgədə əməliyyat aparan İsrail hərbçiləri üçün birbaşa təhlükə yaradırdı. Bu səbəbdən hava zərbəsinin endirilməsi barədə qərar qəbul edilib.

Hadisə ilə bağlı HƏMAS tərəfindən hələlik rəsmi açıqlama verilməyib.