Böyük Britaniya Silahlı Qüvvələrinin Baş Qərargah rəisi Riçard Nayton ölkəsinin son onilliklərin ən mürəkkəb təhlükəsizlik dövrü ilə üz-üzə qaldığını bəyan edib.

Realmedia.info xəbər verir ki, o, bu barədə BBC Radio 4-ün efirində çıxışı zamanı danışıb.

"Nə qədər xatırlayıramsa, bu, ən təhlükəli dövrdür", – deyə Nayton bildirib.

Baş Qərargah rəisinin sözlərinə görə, Rusiya Böyük Britaniyanın müdafiə sistemini davamlı şəkildə sınaqdan keçirir və müxtəlif istiqamətlərdə təzyiq göstərir. O vurğulayıb ki, bu cür fəaliyyətlər vəziyyətin daha da gərginləşməsinə və təhlükəli həddə çatmasına səbəb ola bilər.

Riçard Nayton qeyd edib ki, Britaniya Silahlı Qüvvələri son illərdə əsasən qısamüddətli əməliyyatlara hazırlaşıb. Lakin dəyişən geosiyasi şərait ölkəni daha uzunmüddətli və genişmiqyaslı münaqişələrə hazırlıqlı olmağa məcbur edir.

Onun fikrincə, müdafiə sahəsinə ayrılan maliyyə vəsaiti artırılmalı və bu proses sürətləndirilməlidir.

"Biz müdafiəyə daha çox investisiya yatırmalı və bunu daha operativ şəkildə həyata keçirməliyik. Resursların yenidən bölüşdürülməsi ilə bağlı çətin qərarların qəbulu hökumətin üzərinə düşür", – deyə o bildirib.

Nayton həmçinin Rusiyanın uzaqmənzilli hərbi aviasiyasının Uzaq Şimal bölgəsində fəaliyyətinin son dövrlərdə nəzərəçarpacaq dərəcədə artdığını vurğulayıb.

Qeyd edək ki, Böyük Britaniyanın Baş naziri Kir Starmer də bir gün əvvəl ölkənin müdafiə siyasəti ilə bağlı açıqlamasında Rusiyanın gələcək illərdə NATO üçün potensial təhlükə yaratdığını bildirib. Onun sözlərinə görə, Britaniya kəşfiyyatı və alyansın bəzi üzvləri Moskvanın artıq 2030-cu ildə NATO-ya qarşı hərbi addımlar ata biləcəyini istisna etmirlər.

NATO rəhbərliyi də son aylarda üzv dövlətləri müdafiə xərclərini artırmağa çağırıb. Alyansın baş katibi Mark Rütte Rusiyadan qaynaqlanan risklərə qarşı diqqətli olmağın vacibliyini vurğulayaraq, üzv ölkələri təhlükəsizlik sahəsində daha fəal addımlar atmağa səsləyib.