ABŞ Prezidenti Donald Trump İranla nüvə sazişinin əldə olunmayacağı təqdirdə hərbi variantın gündəmə gələ biləcəyini bildirib.

RealMedia.info xəbər verir ki, ABŞ lideri bu barədə foxnews.com⁠ telekanalına müsahibəsində danışıb.

“Mən heç yerə tələsmirəm. Tələsdiyimi demək istərdim, çünki saziş bağlanacağı təqdirdə benzinin qiyməti aşağı düşəcək. Lakin tələssək, yaxşı bir saziş bağlamaq mümkün olmayacaq. Düşünürəm ki, biz ya əla bir saziş bağlayacağıq, ya da bu işi hərbi yolla həll edəcəyik”, – deyə Tramp bildirib.
ABŞ Prezidenti qeyd edib ki, Vaşinqton istədiyi nəticəni addım-addım əldə edir.

“Yavaş-yavaş, amma əminliklə, məncə, bizə lazım olanı əldə edirik. Əgər buna nail ola bilməsək, onda bu məsələyə başqa üsulla son qoyacağıq”, – deyə o vurğulayıb.

Tramp eyni zamanda İranla bağlı məsələdə diplomatik razılaşmaya üstünlük verdiyini də qeyd edib.