Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva və Bakı Media Mərkəzinin rəhbəri Arzu Əliyeva Lənkəran şəhərində yerləşən Osman Mirzəyev adına 5 saylı Uşaq evi sosial xidmət müəssisəsini ziyarət ediblər.

Realmedia.info xəbər verir ki, onlar müəssisədə tərbiyə alan uşaqlarla görüşərək səmimi söhbət aparıb, onların gündəlik məşğuliyyətləri ilə maraqlanıblar.

Görüş çərçivəsində uşaqlarla birlikdə dulusçuluq nümunələri hazırlanıb. Leyla Əliyeva və Arzu Əliyeva uşaqların yaradıcılıq prosesində iştirak edib, onlarla xoş vaxt keçirib və müxtəlif hədiyyələr təqdim ediblər.

Daha sonra uşaqlar üçün animasiya filmlərinin nümayişi təşkil olunub. “Azərbaycan Animasiya Assosiasiyası” İctimai Birliyinin təşkilatçılığı ilə keçirilən tədbirdə “İsi və Piti” animasiya serialının bölümləri, eləcə də maarifləndirici və əyləncəli animasiya filmləri təqdim edilib.

Nümayiş olunan filmlər uşaqlar tərəfindən böyük maraqla qarşılanıb. Tədbirin uşaqların asudə vaxtının səmərəli təşkili, yaradıcılıq qabiliyyətlərinin inkişafı və milli animasiya filmlərinə marağın artırılması baxımından əhəmiyyət daşıdığı bildirilib.