Bakı, 16 mart 2026 – Strateji Obyektlərin Mühafizəsi Dövlət Agentliyinin (SOMDA) rəhbərliyi və şəxsi heyəti martın 16-da peşə bayramı münasibətilə Fəxri və Şəhidlər xiyabanını ziyarət edib.

Realmedia.info xəbər verir ki, ziyarət öncəsi Fəxri xiyabanda ümummilli lider Heydər Əliyevin məzarı qarşısında ehtiram mərasimi keçirilib. SOMDA-nın rəhbərliyi və əməkdaşları xatirəsini dərin ehtiramla yad edərək məzara əklil qoyub və gül dəstələri düzüblər. Görkəmli oftalmoloq alim, akademik Zərifə Əliyevanın xatirəsi də ehtiramla anılıb.

Daha sonra Şəhidlər xiyabanına yollanan agentlik əməkdaşları və rəhbərliyi Vətənimizin azadlığı və suverenliyi uğrunda canlarından keçmiş qəhrəmanların xatirəsini anıblar, məzarları üzərinə gül dəstələri düzüb və "Əbədi məşəl" abidəsinin önünə əklil qoyublar.

Ziyarət zamanı SOMDA-nın rəhbərliyi şəxsi heyətə vətəndaşlıq və peşəkarlıq ruhunu yüksək səviyyədə qorumağın önəmini vurğulayıb.