Bu gün Azərbaycan Respublikası Strateji Obyektlərin Mühafizəsi Dövlət Agentliyi əməkdaşlarının peşə bayramı günü qeyd olunur.

Realmedia.info xəbər verir ki, bu barədə Azərbaycan Respublikasının Prezidenti İlham Əliyev tərəfindən imzalanmış müvafiq Sərəncamlar və fərmanlar əsasında məlumat verilib.

2020-ci il 16 mart tarixli fərmana əsasən, Azərbaycan Respublikasının Xüsusi Dövlət Mühafizə Xidməti ləğv edilərək onun əsasında üç dövlət orqanı yaradılıb:
Azərbaycan Respublikası Prezidentinin Təhlükəsizlik Xidməti, Xüsusi Rabitə və İnformasiya Təhlükəsizliyi Dövlət Xidməti və Strateji Obyektlərin Mühafizəsi Dövlət Agentliyi.

Daha sonra 2021-ci il 22 dekabr tarixli fərmanla Agentliyin Əsasnaməsi və strukturu təsdiqlənib. 2024-cü il 22 oktyabr fərmanları ilə isə Agentliyin rəsmi emblemi və hərbi qulluqçularının geyim forması, fərqləndirmə nişanları təsdiqlənib.

2024-cü il sentyabrın 24-də Prezident İlham Əliyev Azərbaycan Respublikası Prezidentinin Təhlükəsizlik Xidməti, Xüsusi Rabitə və İnformasiya Təhlükəsizliyi Dövlət Xidməti və Strateji Obyektlərin Mühafizəsi Dövlət Agentliyi əməkdaşlarının peşə bayramlarının təsis edilməsi haqqında Sərəncam imzalayıb. Sərəncama əsasən, hər il martın 16-da Agentliyin əməkdaşlarının peşə bayramı günü qeyd olunur.

Bu gün əməkdaşlar öz peşələrini və dövlətin strateji obyektlərinin qorunmasında göstərdikləri xidmətləri qeyd edirlər.