Heydər Əliyev Fondunun vitse-prezidenti Leyla Əliyeva 24 fevral 2026-cı il tarixində Quba rayonuna səfər çərçivəsində yerli arıçı Zəfər Əzizovun ailə təsərrüfatını ziyarət edib və onların qonağı olub.

Ziyarət zamanı Leyla Əliyeva arıçı ailəsi ilə səmimi söhbət edib, onların gündəlik fəaliyyətləri ilə yaxından maraqlanıb və arıçılığın aspektləri barədə məlumat alıb.

Arıçı Zəfər Əzizov “Ballı Pətək” brendi ilə fəaliyyət göstərən təsərrüfatın yaranma tarixindən və inkişafından danışıb. O, peşəkar arıçılığa 1997-ci ildə yalnız iki arı ailəsi ilə başladığını, hazırda isə bu sayın 200-ü öt­düyünü bildirib. 2010-cu ildən təsərrüfat bazara müxtəlif növ bal — yay, meşə və dağ balı təqdim edir.

Zəfər Əzizov həmçinin məhsul istehsalı üçün arı ailələrini mövsümi olaraq Xaçmaz, Şabran, Qusar və Quba rayonlarına apardığını, illik istehsal gücünün 2-3 ton olduğunu, eləcə də arı südü, çiçək tozu və güləm kimi faydalı məhsullar istehsal etdiklərini vurğulayıb. Əlavə olaraq, o, cins ana arı yetişdirməklə də məşğul olduğunu qeyd edib.

Görüşün səmimi atmosferində Leyla Əliyeva arıçı ailəsi ilə birgə arı mumundan təbii şamlar hazırlayıb. Ailə göstərilən diqqətə görə minnətdarlığını bildirərək Leyla Əliyevaya hədiyyə təqdim edib.

Bu ziyarət kənd təsərrüfatı ilə məşğul olan ailələrin fəaliyyətini təbliğ etmək və regionların sosial-iqtisadi inkişafına dəstək məqsədi daşıyır.