Azərbaycan Respublikasının Fövqəladə Hallar Nazirliyinin Xüsusi Riskli Xilasetmə Xidmətinin xilasedicisi Sima Səfərova Cənubi Amerikanın ən yüksək zirvəsi hesab olunan Akonkaquaya (6 962 metr) uğurla qalxıb.

Realmedia.info xəbər verir ki, ekspedisiya Azərbaycan Alpinizm Federasiyasının təşkilatçılığı ilə həyata keçirilib. Yanvar ayının ortalarında başlayan yürüş sərt hava şəraiti, güclü küləklər və aşağı temperatur fonunda baş tutub. Buna baxmayaraq, Sima Səfərova yüksək fiziki hazırlıq və peşəkar təcrübə nümayiş etdirərək zirvəyə çatmağa nail olub.

Zirvədə Azərbaycan Respublikasının Dövlət Bayrağı və Fövqəladə Hallar Nazirliyinin bayrağı dalğalandırılıb. Bu addım Azərbaycanın beynəlxalq alpinizm uğurlarına növbəti töhfə kimi qiymətləndirilir.

Qeyd edək ki, Argentinada yerləşən Akonkaqua təkcə Cənubi Amerikanın deyil, həm də dünyanın ən yüksək və ən çətin fəth olunan zirvələrindən biridir. Buraya qalxış alpinistlərdən ciddi dözümlülük, texniki bacarıq və təhlükəsizlik qaydalarına maksimum riayət etməyi tələb edir.

Sima Səfərovanın bu nailiyyəti ölkədə xilasedicilərin peşəkarlıq səviyyəsini və Azərbaycanın idman potensialını bir daha nümayiş etdirir.