Azərbaycanın Avropa İnsan Hüquqları Məhkəməsi (AİHM) yanında səlahiyyətli nümayəndəsi Çingiz Əsgərov məhkəmənin "V.T. və digərləri Azərbaycana qarşı" işi üzrə 18 iyun 2026-cı il tarixli qərarını tənqid edib.

Realmedia.info xəbər verir ki, Çingiz Əsgərovun yaydığı bəyanatda sözügedən qərarın ədalətsiz, qərəzli və beynəlxalq hüququn əsas prinsiplərinə zidd olduğu bildirilib.

Bəyanatda qeyd olunub ki, AİHM qərar qəbul edərkən hadisələrin bütün hallarını hərtərəfli araşdırmayıb və kifayət qədər mötəbər sübutlara əsaslanmayıb.

Azərbaycan tərəfi məhkəmənin ölkənin etirazlarına baxmayaraq, dövlətin suverenliyi və ərazi bütövlüyü ilə ziddiyyət təşkil edən terminologiyadan istifadə etməsini də tənqid edib. Bildirilib ki, qondarma "Dağlıq Qarabağ Respublikası"na və onun müxtəlif strukturlarına edilən istinadlar beynəlxalq səviyyədə tanınmayan separatçı quruma legitimlik görüntüsü yaradır.

Səlahiyyətli nümayəndə vurğulayıb ki, AİHM-in daha əvvəl "Çıraqov və digərləri Ermənistana qarşı" işi üzrə qəbul etdiyi qərarda Ermənistanın Azərbaycanın işğal olunmuş əraziləri üzərində faktiki nəzarəti təsdiqlənsə də, son qərarda həmin ərazilərin "DQR" kimi təqdim olunması hüquqi baxımdan ziddiyyətli görünür.

Bəyanatda, həmçinin qərarın qəbul edilməsi zamanı Ermənistan vətəndaşı olan hərbçinin Azərbaycan ərazisində xidmət keçməsinin səbəblərinin araşdırılmadığı və iş materiallarının Ermənistan tərəfindən təqdim edilməsinin diqqətdən kənarda saxlanıldığı qeyd olunub.

Azərbaycan tərəfi hesab edir ki, qərar faktların birtərəfli qiymətləndirilməsi əsasında qəbul edilib, Ermənistanın təqdim etdiyi materiallara üstünlük verilib və Azərbaycanın mövqeyi lazımi səviyyədə nəzərə alınmayıb.

AİHM-in qərarının kompensasiya ilə bağlı hissəsi də tənqid olunaraq bildirilib ki, məhkəmə bu məsələdə əvvəlki presedentlərdən fərqli yanaşma nümayiş etdirib. Bu isə qərarın obyektivliyi ilə bağlı suallar yaradır.

Çingiz Əsgərov AİHM-in qərarında əks olunan nəticələrin qəti şəkildə rədd edildiyini vurğulayaraq, Azərbaycanın bu qərarla bağlı bütün mümkün hüquqi və prosessual mexanizmləri nəzərdən keçirəcəyini bildirib.