“Sea Breeze” kurort-şəhərinin inkişafında əsas prioritetlərdən biri müasir əyləncə infrastrukturunun genişləndirilməsi və beynəlxalq tədbirlərin təşkili olaraq qalır.

Realmedia.info xəbər verir ki, “Sea Breeze” layihəsinin təsisçisi, Emin Ağalarov və Agalarov Development prezidentinin sözlərinə görə, layihə artıq regional deyil, beynəlxalq ekosistemə çevrilməkdədir.

O bildirib ki, kompleksdə mütəmadi olaraq investisiya və iqtisadi forumlar keçirilir, xarici tərəfdaşlar və biznes nümayəndələri layihəyə cəlb olunur. Paralel olaraq beynəlxalq brendlərin, restoran və otel şəbəkələrinin iştirakı genişləndirilir.

Emin Ağalarovun sözlərinə görə, “Sea Breeze” tədricən lokal kurort statusundan çıxaraq Azərbaycanla assosiasiya olunan beynəlxalq brendə çevrilir.

Layihə çərçivəsində yeni inkişaf istiqamətlərindən biri kimi “Sky Views” dağ kurort kompleksinin inşasına başlanıldığı bildirilib. Layihəyə xizək eniş zolaqları, otel, şalelər və yaşayış kompleksləri daxildir.

Bundan əlavə, sahibkar Azərbaycanın hüdudlarından kənarda da – Özbəkistan və Monteneqro kimi ölkələrdə investisiya layihələrinin nəzərdən keçirildiyini qeyd edib. O, Portonovi layihəsini beynəlxalq əməkdaşlığın nümunəsi kimi göstərib.

Ağalarov investisiya modelində sabit gəlirlilik, geri alış (buyback) mexanizmi və kapitalın qorunmasının əsas prinsip olduğunu vurğulayıb. Onun sözlərinə görə, layihə yüksək likvidlik və gəlir potensialı ilə investorlar üçün cəlbedicidir.

O, həmçinin regionun inkişafında dövlət dəstəyinin – infrastruktur, su, enerji və yol təminatının vacibliyini qeyd edib.

Sonda Emin Ağalarov layihənin əsas məqsədinin “Sea Breeze”i qlobal investisiya və turizm mərkəzinə çevirmək olduğunu bildirib. Sea Breeze artıq minlərlə yerli və xarici investor üçün maraqlı platforma kimi təqdim olunur.